نبيل برادعي : امشي بجنازة ولا تمشي بجوازة!

جاري أبو جاسم تقاعد من شغله قبل ثلاث أشهر.. ما مضى منهن شهر إلا طلبت أم جاسم الطلاق!! يا بنت الحلال، غيّري، بدلي، صارلكن أربعين سنة! قال شو: قاعدلها بالبيت ٢٤ ساعة على نق وانتقادات نص يومه بالمطبخ، وهات تعليقات ونصائح ونق!! سحبتها أنا عجنب وقلتلها عندي إلك حل!! اشتريله تلفون ذكي، ونزليله عليه انترنت وواتساب.. وإلك عليي ما تشوفي خلقته طول النهار!! ما كذبت خبر المرا. جابتله تلفون، وخلت بنتها تعلمه عليه شهر زمان! شوي بتبلش توصلني من أبو جاسم مسجات عالواتساب!! بالبداية كان المعدل ستة سبعة كل يوم! بعدين بلشت تزيد.. حكم، ومواعظ، وأفلام، ونكت، ومن عجائب العالم!! عند صلاة الصبح، وعالفطور، وبالشغل، وبعد نص ليل! وصار لازم فضي رسائله أول بأول كل يوم حتى ما يجمد تلفوني! وخصصت بجدولي اليومي نص ساعة كل يوم لحذف رسائل أبو جاسم! وصرت عض أصابعي على النصيحة اللي عطيتها لأم جاسم! عم فكر ارجع وأقنعها بفوائد الطلاق. بس شو الفايدة؟ تتطور أبو جاسم وما عاد حدا يقدر يهدّيه!!