جاء في مقدمة أخبار المؤسسة اللبنانية للإرسال:
“حين يصل الأمر إلى منع أغاني فيروز في الجامعة اللبنانية، فأين يكون قد أصبح البلد؟
فيروز التي احتفل لبنان بعيد ميلادها الواحد والثمانين منذ أيام، ووُضِعَت صورتها، بالضوء، على أعمدة مدينة بعلبك، تُمنَع أغانيها في الجامعة اللبنانية، من ضمن أغانٍ أخرى، منها اغانٍ لجوليا، كانت مجموعة من الطلاب تريد بثَّها إحياءً لذكرى طالب قضى في حادث سير… الأغرب من المنع هو هوّية المانع الذي لم يكن إدارةَ الجامعة، بل التعبئةَ الطالبية في حزب الله.
وبالتأكيد رضخت الإدارة وترجمت رضوخها بوقف الإحتفال بدل منع المانعين، هكذا فإن فيروز التي تعيش في وجدان اللبنانيين منذ أكثر من نصف قرن، تُمنَع بشطبة قرارِ مجموعة طالبية لا تملك الإدارةُ الجرأة على وقفها عند حدِّها… في الجامعة اللبنانية هناك معهد الفنون الجميلة الذي يُعلِّم المسرح وما فيه من فنون, وبينها الأغاني، فهل نصل إلى يومٍ تُطالب فيه التعبئة الطالبية في حزب الله بإلغاء معهد الفنون الجميلة لأن فيه موسيقى وأداءً ونغمَ؟”.
.
محمد حمادي الشاب الذي سرقه حادث سير من جامعته وأصدقائه في 23 تشرين الأوّل، لم تسمح التعبئة التربوية التابعة لحزب الله بإحياء عيد ميلاده يوم أمس الخميس 31 تشرين الثاني في كلية الهندسة -الحدثة، وقد كتبت إحدى صديقاته عبر صفحتها فيسبوك:
“مبارح بذكرى ميلاد محمد، حبّيت أنا ورفقاتو نعيدوا بنشاط بيشبهو وبيبسطوا!
طيرنا بوالين معلقة فيهن صورو. حبّينا نحطلو الاغاني اللي بحبها.. اغاني الثورة واغاني حبيبتو فيروز.. بس!!!!!! لمدة ربع ساعة قبل الساعة ٨.
باختصار
اخدنا اذن من مدير الكلية واعلمنا مجلس طلاب الفرع، يللي اعترض عالموضوع بحجة انّو في ناس ما بتسمع اغاني! قلنالو معليش مرقولنا ياها هالربع ساعة.
كرمال نتدارك الموضوع قلنالن ما رح نعلّي الصوت. ويللي ما بدّو يسمع بيقدر يبعد عشر دقايق الصوت ما رح يكون عالي..
.
تاني يوم الصبح رحنا من الساعة ستة ونص لنحضر…منتفاجأ بطلاب من التعبئة التربوية مجمعين ع غير عادة! الساعة سبعة وشوي بكون صار في حوالي ال ٣٠ شب قاعدين بساحة الكلية، ولمّا جبنا السبيكر لنحط الاغاني بقوموا طلاب التعبئة بيوقفوا فوقو وبقولولنا اغاني هون ما رح ينحط.
.
قلنالهن انو نحنا معنا اذن مدير وهيدا حقنا وهني اصرّو عموقفن انّو اغاني بالكلية ممنوع ينحط وبلشنا نتجادل.
اجت امو ل محمد ملهوفة لتحتفل معنا ب عيدو بالطريقة اللي بحبها.
ولما وصلت حكينا مسؤول التعبئة ع جنب انو لو سمحتو امّو وصلت وقفو المشاكل وكسرو الشر وخلونا نحط الاغاني هالعشر دقايق الباقية للساعة ٨ وما وافق والمشكل كبر مع قدوم الطلاب واجا المدير وتم استدعاء الامن وكلّو بوجود امّو ل محمد!
.
التعبئة غير انها ما احترمت قرار المدير وحق الطلاب باقامة نشاط ضمن اطار القانون، ما احترمت ذكرى ميلاد محمد اللي بعد ما صرلو 40 يوم غايب… ولا احترموا امّو يللي احترق قلبها لّما ما نحطت الاغاني الوطنية واغاني فيروز يللي ابنها كان يحبن، ما احترمو رفقاتو يللي حبّو يحيو ذكراه هالمرّة بس ولمدّة ربع ساعة قبل الدوام!!!!
.
وقررّت بدل ما تعترض قبل بيوم وتحاول توصل لحل عبر النقاش انّو تجمع طلابها وتخرب النشاط والذكرى بالقوة من دون اي تعاطف مع اهلو واصدقاؤه!!
شكرآ لإنسانيتكم وشكرآ لتعاطفكم.”