البلد مابيرجع يتعمر لنرجع الطبقة الوسطى

أكيد عم تسألوا هلا ياترى نحنا من هي الطبقة وهالطبقة مين بتضم ؟ هالطبقة بتضم الموظف والطبيب والمهندس والمحامي والمعلم .. وكل أصحاب المهن الإنسانية النبيلة يلي عم يجيبوا قرشهن بالحلال وبعرقهن وتعبهن هالطبقة بتضم اللحام والخباز وعمال البناء والكندرجي والمزارع والعامل وكل يلي بيقدموا خدماتهن لباقي المجتمع باخلاص ومحبة هالطبقة هي بلشت تموت وقت بلشت الطبقة الغنية تضاعف ثرواتها وأموالها .. وكل مازاد جشع هالطبقة كل مازاد صراع الطبقة الوسطى للبقاء بس لحتى تحافظ على شوية البريستيج يلي عايشة فيه .. من ست سنين صرنا نسمع بزيادة عدد الأغنياء .. كنا أول شي بالعشرة الأوائل .. بعدين صرنا بالمية الأوائل .. وبعدين صرنا بالألف الأوائل .. وكل مازادت الطبقة الغنية واحد زاد تحول الطبقة الوسطى إلى الطبقة المعدمة المقهورة .. ومن ست سنين لهلا تآكلت هالطبقة وصارت عالأرض .. وبلش المجتمع كله يتآكل ليصير فيه تلت طبقات طبقة فقيرة عريضة وواسعة وطبقة ضيقة وصغيرة يادوب تحمل حالها وطبقة عّم تستفيد من يلي صار .. مشان هيك كل هالانهيار يلي عم تشوفوا ببلدنا مو بس سببه التدمير والقتل والخراب .. سببه كمان أنه هالطبقة ماتت ومات معها كل نشاط اجتماعي واقتصادي .... جماعة الطبقة الفقيرة صاروا لاجئين ومنكوبين ... وجماعة الطبقة الوسطى صاروا فقرا عم يناضلوا ليعيشوا مو فاضيين ليبنوا ويقدموا خدماتهن للأغنياء ... وجماعة الطبقة الغنية هربت وصارت برات البلد وجزء منها عّم يستغل الناس البلد مابيرجع يتعمر لنرجع الطبقة الوسطى